Azərbaycan tarixində elə şəxsiyyətlər var ki, onların adı sadəcə tarixlə yox, həm də milli yaddaşla, dövlətin varlığı ilə, xalqın tale yolu ilə birbaşa bağlıdır. Belə dahi şəxsiyyətlərdən biri, bəlkə də birincisi, müstəqil Azərbaycanın memarı və qurucusu, dünya miqyasında tanınan siyasətçi, qüdrətli dövlət başçısı Ulu Öndər Heydər Əliyevdir. O, təkcə Azərbaycanın siyasi, iqtisadi və mədəni həyatında deyil, eyni zamanda ölkənin strateji strukturlarından biri olan gömrük sisteminin də formalaşmasında və inkişafında əvəzsiz rol oynamışdır.
Bu gün gömrük orqanları yüksək səviyyədə fəaliyyət göstərirsə, bu sahədə beynəlxalq standartlara uyğun islahatlar həyata keçirilirsə, bunun əsas səbəbi məhz Heydər Əliyev dühasının zamanında atdığı strateji və prinsipial addımlardır. Aksizli Mallar üzrə Baş Gömrük İdarəsinin rəisi, general-mayor Vəzir Həsənov da bu reallığı qeyd edərək bildirir: “Gömrük sisteminin qurulmasında Ulu Öndər Heydər Əliyevin töhfəsi əvəzolunmazdır.”
Ulu Öndər Heydər Əliyev dövlət idarəçiliyində sistemli düşüncə, milli maraqlara əsaslanan siyasət və şəffaf idarəetmə modelinin banisi olmuşdur. O, SSRİ dövründə Azərbaycan SSR-nin rəhbəri kimi fəaliyyət göstərdiyi zamanlardan başlayaraq dövlətin bütün sahələrinin – sənaye, təhsil, səhiyyə, mədəniyyət və iqtisadiyyatla yanaşı gömrük və sərhəd nəzarət sisteminin də mükəmməlləşdirilməsinə xüsusi diqqət yetirmişdir.
Müstəqillik əldə etdikdən sonra isə Ulu Öndər Heydər Əliyev gömrük sisteminin müstəqil dövlətin iqtisadi təhlükəsizliyinin təminatında mühüm rol oynadığını dönə-dönə vurğulamış və bu sahədə kompleks islahatların həyata keçirilməsinə nail olmuşdur. Onun tapşırığı ilə Azərbaycan Respublikasının Gömrük Komitəsi yaradıldı, yeni gömrük məcəlləsi qəbul olundu, sərhəd-gömrük postları yenidən quruldu, informasiya texnologiyaları tətbiq olunmağa başlandı və bu sahədə beynəlxalq əməkdaşlıq genişləndirildi.
Ulu Öndər Heydər Əliyev gömrük sisteminin təkcə maliyyə yığım strukturu deyil, həm də dövlətin iqtisadi təhlükəsizliyini və strateji maraqlarını qoruyan bir orqan olduğunu xüsusi qeyd edirdi. Onun rəhbərliyi dövründə gömrük sistemində korrupsiya halları ilə ciddi mübarizə aparıldı, kadr islahatları həyata keçirildi və bu sahəyə peşəkar mütəxəssislər cəlb olundu.
Əldə edilən uğurlar onu deməyə əsas verir ki, bu gün Azərbaycan gömrük xidməti regional və beynəlxalq əməkdaşlıq platformalarında nüfuzlu tərəfdaş kimi çıxış edirsə, bu, məhz Heydər Əliyevin müəyyən etdiyi strateji xəttin nəticəsidir.
Azərbaycan Respublikası Dövlət Gömrük Komitəsinin fəaliyyəti elə qurulmuşdur ki, bu sistem ölkənin iqtisadi suverenliyinin qorunmasında əsas dayaqlardan birinə çevrilmişdir. Bu istiqamətdə Ulu Öndər Heydər Əliyevin “gömrük dövlətin özünüdərki, iqtisadi sərhədlərin müdafiəsi, milli bazarın qorunması və büdcənin formalaşması üçün əsas vasitədir” kimi fikirləri daim rəhbər tutulmuşdur.
Bu gün Aksizli malların dövriyyəsinə nəzarət və vergi yığımı sahəsində yüksək nəticələr əldə olunubsa, bu, gömrük strukturunun düzgün təməllər üzərində formalaşmasının bəhrəsidir. General-mayor Vəzir Həsənovun vurğuladığı kimi, bu uğurların əsas səbəbi məhz Ulu Öndərin uzaqgörən və dövlətçi baxışının nəticəsidir.
Bu gün Prezident İlham Əliyevin rəhbərliyi ilə gömrük sistemində aparılan modernizasiya və rəqəmsallaşma prosesləri də məhz Heydər Əliyev ideyalarının davamı kimi dəyərləndirilməlidir. Ulu Öndərin qoyduğu bünövrə üzərində Azərbaycan gömrük sistemi dünya standartlarına uyğun inkişaf edir, şəffaflıq və səmərəlilik artırılır, elektron gömrük sistemləri tətbiq olunur.
General-mayor Vəzir Həsənovun rəhbərlik etdiyi Aksizli Mallar üzrə Baş Gömrük İdarəsi də bu istiqamətdə nümunəvi fəaliyyət göstərir. İdarə həm dövlət büdcəsinin formalaşmasında aktiv iştirak edir, həm də aksizli məhsulların qanunsuz dövriyyəsinin qarşısını almaqla, ictimai sağlamlığa və iqtisadi təhlükəsizliyə xidmət edir. Bütün bunlar bir daha göstərir ki, Heydər Əliyev irsi bu gün də yaşayır və inkişaf edir.
10 may 2025-ci il tarixində Ulu Öndər Heydər Əliyevin anadan olmasının 102-ci ildönümü tamam olur. Hər il bu tarix Azərbaycan xalqı üçün yalnız bir xatirə günü deyil, həm də dövlətçilik dərslərinin və milli ideologiyanın dərinləşdirilməsi günü kimi qəbul olunur. Ulu Öndərin anım günlərində ölkənin bütün regionlarında silsilə tədbirlər keçirilir, onun dövlətə və millətə verdiyi əvəzsiz töhfələr hörmətlə anılır.
Milyonlarla azərbaycanlının qəlbində Heydər Əliyev adı müqəddəsdir. Çünki o, ölkəni parçalanmaqdan, vətəndaş müharibəsindən, iqtisadi böhrandan xilas etdi, sabitlik və inkişaf yoluna çıxardı. Hər bir gömrük əməkdaşı, hər bir dövlət qulluqçusu bu gün də öz işini Ulu Öndərin prinsipləri əsasında qurmağa çalışır.
Bu gün ölkəmizdə fəaliyyət göstərən hər bir dövlət qurumu, o cümlədən gömrük orqanları Heydər Əliyev ideyalarına söykənərək fəaliyyət göstərir. Ulu Öndərin strateji baxışları, dövlətçilik təlimi və idarəçilik modeli hər zaman aktualdır və gələcək nəsillərə də örnək olacaqdır.
General-mayor Vəzir Həsənovun dediyi kimi: “Gömrük sisteminin qurulmasında Ulu Öndər Heydər Əliyevin töhfəsi əvəzolunmazdır.” Bu reallıqdır və bu reallıq həm keçmişimizin, həm bu günümüzün, həm də gələcəyimizin təminatıdır.
Azərbaycan xalqı bu dahi şəxsiyyətin xatirəsini daim uca tutacaq, onun irsini qorumalı və yaşatmalıdır.
Allah Ulu Öndərimizə rəhmət eləsin. Ruhu şad olsun.