Məlumdur ki, ölkəmizdə bələdiyyələrin yaranması, formalaşması və hüquqi bazası məhz Ümummilli Lider Heydər Əliyevin adı ilə bağlıdır. Heydər Əliyevin fəaliyyəti dövründə, 12 noyabr 1995-ci ildə qəbul edilən Azərbaycan Respublikasının Konstitusiyasında ilk dəfə olaraq bələdiyyələrin hüquqi statusu qanun çərçivəsində müəyyənləşdirilib. Dövlətçilik tarixinə mühüm hadisə kimi daxil olan bu tarixi gündən sonra, 1999-cu ilin dekabrında ilk bələdiyyə seçkilərinin keçirilməsi ilə hakimiyyətin əks mərkəzləşməsi prosesinə start verildi. Ümummilli liderimizin səyi ilə dövlət quruculuğu sahəsində aparılan islahatlar nəticəsində və Avropa Şurasının təklifləri nəzərə alınmaqla ölkəmizdə bələdiyyə institutu yaradıldı. Milli lider Heydər Əliyev öz çıxışlarında bələdiyyə institutunun yaranmasına, bu sistemin fəaliyyətinə belə münasibət bildirirdi: “Bələdiyyə seçkiləri Azərbaycanda ilk dəfə keçirilir. Bələdiyyələrin yaranması və onlara seçkilərin keçirilməsi haqqında 1995-ci ildə müstəqil Azərbaycanın qəbul etdiyi ilk Konstitusiyada müvafiq müddəallar öz əksini tapıbdır. 
Buna görə də bələdiyyələrin təşkil olunması və onun üçün seçkilərin keçirilməsi öncə Azərbaycan Konstitusiyasının əsasındadır və Konstitusiyanın müddəalarının həyata keçirilməsini göstərir”. Digər bir çıxışında milli lider belə bir məqama da toxunub: “Biz Azərbaycanda tam müstəqil yerli özünüidaretmə orqanları yaradırıq. Bu, həm demokratiyanın inkişafı deməkdir, eyni zamanda ölkəni idarə etməkdə vətəndaşlarımıza imkanlar yaranmasının göstəricisidir… 
Yerli idarəetmə orqanları isə yerlərdə onların səlahiyyətləri çərçivəsində çox işlər görülə bilərlər. Bələdiyyələr dövlətin də gördüyü işlərin böyük bir hissəsini öz üzərilərinə götürəcək, dövlətin də yükünü müəyyən qədər yüngülləşdirəcəklər. Ona görə bələdiyyələrin seçilməsi, onların təşkil edilməsi, gələcək fəaliyyəti bizim cəmiyyətimiz üçün, dövlətimiz üçün və hər bir vətəndaş üçün çox vacibdir”.
Bələdiyyələr yerliözünüidarəni həyata keçirən orqan kimi müəyyən edilmişdir. Bələdiyyə dedikdə, qanunla müəyyən edilmiş ərazi hüdudları daxilində yerli özünüidarəetmə forması kimi başa düşülür. 
Bələdiyyə öz mülkiyyətinə və yerli büdcəyə malikdir. Yerli əhəmiyyətli məsələlər dedikdə, bələdiyyə əhalisinin həyat fəaliyyətinin bilavasitə təmin edilməsi ilə bağlı Azərbaycan Respublikasının Konstitusiyası və qanunları ilə müəyyənləşdirilən məsələlər başa düşülür. Bələdiyyə qulluğu Azərbaycan Respublikasının vətəndaşları üçün eyni dərəcədə müyəssərdir. Eyni ilə dövlət idarəçiliyi kimi bu idarəçilikdə ictimai maraqların təmin edilməsinə yönəlibdir. 
Aydındır ki, yerli problemləri həmin yerin sakinlərindən daha yaxşı kimsə bilə bilməz. Lakin yerli əhalinin marağı şəxsi deyil, ümumi, ictimai və kütləvi maraqdır və bu ictimai maraqları təmin etməli olan dövlətin maraqları ilə üst-üstə düşür. Bütün deyilənlərdən görüldüyü kimi yerliözünüidarəetmə dövləti fəaliyyətə yaxın bir fəaliyyətdir. Yerliözünüidarəetmə ərazi kollektivinin və dolayısı ilə hər bir vətəndaşın dövlətlə və cəmiyyətlə qarşılıqlı münasibətlərində özünüifadə üsuludur. Yerliözünüidarənin kollegial əsaslarını bələdiyyə nizamnaməsi əsasında yaradılaraq yerli məsələləri kollegial şəkildə həll edən nümayəndəli orqanın olması təşkil edir. 
Bələdiyyələrin fəaliyyətini məqsədyönlü və səmərəli şəkildə icra etmək üçün Binəqədi rayon Bələdiyyəsi hər zaman diqqətlə çalışmışdır. Bələdiyyənin fəaliyyəti ərzində onların səlahiyyətinə aid olan bütün məsələlər tərəfimizdən qanunla həyata keçirilir. Binəqədi rayon bələdiyyəsi olaraq, mütəmadi şəkildə bütün məsələlər barədə bir çox işlər görülür. 2020-ci il ərzində Binəqədi rayon İcra Hakimiyyəti başçısının sərəncamı əsasında rayon ərazisində hər gün təxirə salınmaz işlər həyata keçirilmişdir. Bələdiyyəmiz tərəfindən məişət tullantılarının ətrafa yayılmasının qarşısını almaq, onların daşınmasını asanlaşdırmaq məqsədi ilə mütəmadi olaraq işlər görülmüşdür. Yaşıllıq zolaqları lazımsız tullantılardan təmizlənmişdir. 
Rayon ərazisində uşaqlar üçün bir çox parklar salınmış, yaşlı insanlar üçün yaşayış binalarının həyətlərində oturacaqlar qurulmuşdur. Rayonumuzda COVİD-19 infeksiyasının qarşısının alınması və sakinlərin təhlükəsizliyinin qorunması istiqamətində davamlı olaraq dezinfeksiya işləri həyata keçirilmişdir. Bələdiyyə qulluqçuları tərəfindən vətəndaşlar arasında aparılan maarifləndirmə işinin gücləndirilməsi məqsədi ilə hazırlanan posterlər, maskalar və dezinfeksiya vasitələri əhali arasında paylanılmışdır. Karantin rejimi ilə əlaqədar fəaliyyət göstərən ticarət obyektlərdə monitorinqlər uğurla həyata keçirilmişdir. 
Operativ Qərargahın tələblərinə ciddi şəkildə əməl etməklə, Binəqədi rayon İcra Hakimiyyətinin dəstəyi ilə qaydalara uyğun olaraq, bələdiyyəmiz tərəfindən özəl günləri və bayramları nəzərə alaraq, bir sıra tədbirlər həyata keçirilmişdir. Rayonumuzda yaşayan vətəndaşlar, ahıl, əlil və yardıma ehtiyyacı olan ailələrə karantin müddətində, eyni zamanda bayramlarda yardımlar paylanılmış, bayram sovqatları verilmişdir. Səfərbərliklə bağlı müvafiq hərbi hissələrə və torpaqlarımız uğrunda gedən döyüşlərdə iştirak edən,cəbhə bölgəsində döyüşən əsgərlərimizə ərzaq yardımları göndərilmişdir. 
Qarabağ uğrunda gedən döyüşlər zamanı yaralanan qazilərimizə, şəhid ailələrinə yardımlar olunmuşdur.
Binəqədi rayon bələdiyyəsi olaraq, bələdiyyə səlahiyyətlərinə aid olan yerli əhəmiyyətli məsələlər, eyni zamanda digər işlər qanun çərçivəsində uğurla həyata keçirilmişdir.
Mürsəl Eminov,
Binəqədi rayon Bələdiyyəsinin sədri