"11 yaşlı qızın faciəsi bir ümummili faciədir. Bəli, məhz faciə”.
YENISEHIFE.AZ xəbər verir ki, bu sözləri açıqlamasında Milli Məclisin deputatı Fazil Mustafa deyib. Deputat qeyd edib ki, 11 yaşlı uşaq bir cinsi terrorun qurbanıdır:
"Şossedə avtomobilimizin şüşəsini döyüb pul dilənən o qızlar, oğlanlar da 9-13 yaş arasındadırlar, rayonlarda evlərin küncündə gizlədilən, bir çox hallarda valideynlərinin, atalıq və analıqların, qohumların vəhşəti ilə qarşılaşanlar da bu yaşlardadır. Özümüzü aldatmayaq, məktəblə, icra qurumlarında olan müvafiq komissiyalarla əlaqə və əməkdaşlıq da formal mahiyyət daşıyır. İndi tələb olunur ki, azyaşlı qızlara və oğlanlara təcavüz edən pedofillərə ömürlük həbs cəzası verək. Razıyam, cəza maksimum səviyyədə sərtləşdirilməlidir. Bəs bunu gizlədən cəmiyyətlə nə edək? Bu kimi cinayətlər yüzlərlədir sadəcə gizlədilir. Bunu gizlədənlərin və hətta buna şərait yaradanların içində ana, bacı, qohumlar, yaxınlar var. Gizlətməyin iki səbəbi var, birincisi, çevrənin qınağı, məsxərəsi, tənəsidir, ikincisi isə, ədalət müəssisəsinə güvənsizlikdir. Bəs onda bu iki mühüm amili düzəltmək necə olacaq? Çığırıram, bağırıram ki, ölkədə təhsildən kənarda heç bir uşaq qalmamalıdır, xüsusilə də qız uşaqlarına”.
F.Mustafa cəzaların sərtləşdirilməsinin bu cür halların qarşısını almayacağını söyləyib:
"Birinə, beşinə ən yüksək cəza verin, istəyirsinizsə, lap axtalayın, bu, sadəcə bir təsəllidir, heç bir ibrət tərəfi olmayacaq. Əslində 11 yaşlı uşaq bir cinsi terrorun qurbanıdır, artıq gələcəyi, gəncliyi, arzuları məhv edilib”.
Deputat onu da qeyd edib ki, bu məsələ geniş ictimai müzakirə olunmalıdır: "Hələ biz bilinənə bu cür acıyırıq, bilinməyən yüzlərlə qurbanın ahını eşitmirik. Bu məsələ geniş müzakirə olunmalıdır, parlamentin komitələrindən tutmuş, müvafiq dövlət komitəsində, məktəblərdə, məhəllələrdə, evlərdə müzakirə olunmalıdır. İnsanlar təhlükənin onun ocağına çatmasını gözləməməlidir. Ölkədə bir nəfər də olsun sahibsiz, diqqətdənkənar uşaq qalmamalıdır. Avropada uşağının üstünə çığıran valideynin əlindən dövlət uşağını altı ay, bir il alıb onu cəzalandırır ki, bir də uşağa qarşı şiddət, zorakılıq etməsin. Bu qədər reklam üçün formal qurumlar nəyimizə lazımdır? Əgər 11 yaşlı uşağı terrordan qoruyacaq mexanizm yoxdursa, inkişaf etmiş cəmiyyətdən danışmamız da içi boş sözlərdən başqa bir şey olmayacaq”.