Azərbaycan Dövlət Aqrar Universiteti (ADAU) 2022-ci ilin ikinci yarımilliyinə növbəti uğurlarla başlayıb. Belə ki, ADAU və Ege Universitetinin (EU) birgə layihəsi “VILLAGE” Avropa müsabiqəsində qrant əldə edib.
Adları çəkilən inuversitetlər arasında həyata keçirilən beynəlxalq ikili diplom layihəsi çərçivəsində hərtərəfli əməkdaşlıq münasibətləri inkişaf edir. Birgə fəaliyyət istiqamətlərindən biri də elmi-tədqiqat və beynəlxalq qrant müsabiqələrində iştirakdır. Belə müsabiqələrdən biri də Avropa Komissiyasının həyata keçirdiyi “Horizon Avropa” Tədqiqat və İnnovasiya Proqramıdır. Ege Universitetinin icraçı olduğu VILLAGE (Virtual Innovative Learning Laboratories for Global Engineering Education) – (Qlobal Mühəndislik Təhsili üçün Virtual İnnovativ Tədris Laboratoriyaları) qeyd olunan müsabiqədə qrant əldə edib. Layihə Ege Universitetinin “MSCA Mübadilə Proqramı (Kadr mübadiləsi) çərçivəsində maliyyələşəcək ilk layihəsidir və universitetin beynəlxalq inteqrasiya hədəfinə çatmaq istiqamətində atılmış mühüm addımı hesab olunur.
Layihə mühəndislik ixtisası üzrə fənn tədris edən müəllim və tələbələrin pandemiyadan sonrakı təhsil proseslərini və laboratoriya ehtiyaclarını multidisiplinar, çoxölçülü mədəni kontekstdə yenidən nəzərdən keçirməyi və tələblərə uyğun olaraq yeni tədris modelləri üçün yol xəritələrini müəyyənləşdirməyi hədəfləyir. Bu istiqamətdə təklif olunan modeli sınaqdan keçirmək üçün pilot virtual laboratoriya və təlim materialları hazırlanması və bununla da layihə çərçivəsində effektiv və davamlı tədris modelləri yaradılması nəzərdə tutulub.
Qeyd edək ki, Türkiyənin əsas icrası olduğu layihənin digər tərəfdaşları Azərbaycan, Yunanıstan, İspaniya, Danimarka, İrlandiya, Sloveniya, Malta və Latviyanın müvafiq ali təhsil və sənaye müəssisələridir.
Ölkəmizdə kənd təsərrüfatı mütəxəssisləri hazırlayan əsas ali təhsil ocağı Azərbaycan Dövlət Aqrar Universitetinin uğurlarının əhəmiyyətli hissəsi 25 iyul 2013-cü il tarixdən bu ali təhsil ocağına rəhbərlik edən Universitetin rektoru, AMEA-nın müxbir üzvü, professor İbrahim Cəfərovun səmərəli, peşəkar idarəçilik fəaliyyəti ilə bağlıdır. ADAU-da bu gün aqronomluq, torpaqşünaslıq və aqrokimya, baytarlıq təbabəti, zoomühəndislik, mühəndislik, aqrotexnologiya, aqrar iqtisadiyyat, aqrobiznes və idarəetmə fakültələri fəaliyyət göstərir, 37 kafedrada 550 nəfərdən çox professor-müəllim heyəti çalışır, bakalavriat, magistratura və doktorantura səviyyələrində 33 ixtisas növü mövcuddur. Tədris 6 ixtisasda ingilis dilində, 10 ixtisasda rus dilində, 14 ixtisas üzrə mütəxəssis hazırlığı isə, yalnız dövlət sifarişi əsasında həyata keçirilir.
Bundan əlavə, bu ali təhsil ocağı magistr hazırlığı mərkəzini də özündə birləşdirir və hal-hazırda 6 min nəfərdən çox tələbə - gənclərə əyani və qiyabi təhsil formalarında azərbaycan, rus və ingilis dillərində təhsil verilir. Qeyd edək ki, müasir üslubda təmir olunmuş və istifadəyə verilmiş tədris korpusları, auditoriyalar, laboratoriyalar, tədqiqat mərkəzləri, əsaslı kitabxana və s. məhz hər bir tələbənin burada yüksək keyfiyyətli ali təhsil almalarına lazımi imkanlar yaradır. Bundan əlavə, Universitetin idman zalının yüksək səviyyədə təmir edilməsi, lazımi avadanlıqlarla təchiz olunması və s. hər kəsin idmanla məşğul olmaq istəyini daha da artırır. Əldə etdiyimiz məlumatlara görə, ADAU fəaliyyətə başladığı vaxtlardan bugünə kimi müxtəlif xalqlardan olan 70 minə yaxın yüksək ixtisaslı mütəxəssislər hazırlamışdır və hal-hazırda dünyanın 20-dən çox ölkəsinin 100-dək universiteti ilə sıx əməkdaşlıq əlaqələri var. Universitetdə müasir əmək bazarının tələblərinə uyğun yüksək ixtisaslı mütəxəssis hazırlığını həyata keçirmək üçün hər cür zəngin maddi-texniki baza mövcuddur və bu təhsil ocağının rəhbərliyinin əsas hədəfi, məhz mütəxəssis hazırlığının keyfiyyətini daha da yaxşılaşdırmaqdır, tələbə sayını əhəmiyyətli dərəcədə artırmaqdır, beynəlxalq əlaqələri mümkün qədər genişləndirməkdir, ən əsası ADAU –nu daha yüksək reytinqli ali təhsil müəssisələri sırasına daxil etməkdir.
Sevil Mikayılqızı