Birinci vitse-prezident Mehriban Əliyevanın ictimai-siyasi fəaliyyət spektri əksər sahələri əhatə edir. Azərbaycan həqiqətlərinin beynəlxalq aləmə çatdırılmasında da onun misilsiz xidmətləri var.
Birinci vitse-prezident Mehriban Əliyeva müasirlik, humanizm və xeyirxahlıq, birlik və bərabərlik prinsiplərini əsas tutan müstəqil Azərbaycanın ən görkəmli ictimai-siyasi xadimlərindəndir. Bu dəyərlərin formalaşması, Azərbaycan adının dünyada duyulması, Azərbaycan həqiqətlərinin beynəlxalq aləmə çatdırılmasında birinci xanım Mehriban Əliyevanın misilsiz xidmətləri var.
Azərbaycan qadınına verilən dəyər
Bu gün ölkəmizin adı ilə sahə yoxdur ki, orada Mehriban Əliyevanın imzası və təşəbbüsü olmasın. Onun ictimai-siyasi fəaliyyət spektri əksər sahələri əhatə edir, hər bir vətəndaşın, sakinin həyatına müsbət mənada təsir göstərir. Tək rəhbəri olduğu Heydər Əliyev Fondunun uzun illər Azərbaycanın ictimai-siyasi həyatında oynadığı rolu xatırlatmaq kifayətdir.
Azərbaycanın birinci xanımı Mehriban Əliyeva bu gün müasir Qərb və qədim Şərq ənənələrini özündə birləşdirən Azərbaycan qadını obrazını dünyaya tanıdır. Ailəyə, Vətənə, xalqına dərin sevgi və məhəbbətlə, sarsılmaz iradə ilə bağlanan bu obraz Azərbaycan qadınının nə dərəcədə mükəmməl və yüksək keyfiyyətlərə, xarakterə malik olduğunun təcəssümüdür.
Qlobal miqyaslı fəaliyyət
Mehriban Əliyevanın ICESCO-nun xoşməramlı səfiri olması onun fəaliyyətinin həm də qlobal miqyaslı olmasını şərtləndirir. Dünyada baş verən proseslərin, Azərbaycan üçün mühüm əhəmiyyət daşıyan məqamların düzgün qiymətləndirilməsi Mehriban Əliyevanın rəhbərliyi ilə həyata keçirilən qlobal miqyaslı layihələrin uğurunun əsas təməl prinsiplərindəndir. Birinci xanımın dünya mədəniyyətinə, dinlərarası və mədəniyyətlərarası dialoqa, multikultural dəyərlərin təbliğinə istiqamətlənən uzaqgörən ictimai-siyasi fəaliyyəti Azərbaycanın müasir və demokratik prinsiplərə sahib ölkə imicinin formalaşmasında özünəməxsus rol oynayır. Bu fəaliyyət həm də Azərbaycana qarşı planlar quran qüvvələrin məqsədlərinin reallaşmasının qarşısını alır. Hansı ki, işğal dövründə və tarixi qələbəmizdən sonra ölkəmizə qarşı həyata keçirilən, həqiqətlərdən uzaq informasiya müharibəsinin miqyası günü-gündən artırdı. Məhz Birinci vitse-prezident Mehriban Əliyevanın dünya miqyasında rəğbətlə qarşılanan fəaliyyəti bu informasiya müharibəsində Azərbaycanın ən böyük üstünlüklərindən biri sayılır.
Dünya mədəni irsinə töhfələr
Məhz onun təşəbbüsü ilə Azərbaycan muğamı, dünyanın ən qədim tarix-arxeoloji qoruğu - Qobustan, aşıq sənəti, İçərişəhər kimi neçə-neçə Azərbaycan adına bağlı milli-mənəvi, tarixi-mədəni irsimizin daşıyıcıları olan nümunələr dünya maddi-mənəvi irsi siyahısına daxil edilib. Bu siyahının genişliyi həm də dünyada Azərbaycan adının tanınması, təbliği, ölkənin sosial-iqtisadi inkişafında mühüm rola malik turizm sektorunun dirçəlməsi baxımından böyük əhəmiyyət daşıyır.
Prezidentin ən yaxın silahdaşı
Tarixi qələbəmizdən sonra Azərbaycan daha güclü, daha müasir və müstəqil ölkə olaraq nəinki bölgəmizdə, dünyada mühüm geosiyasi aktor kimi qəbul edilir. Əsası ulu öndər Heydər Əliyev tərəfindən qoyulan Zəfər yolunun şanlı qələbəmizlə, ərazi bütövlüyümüzün, suverenliyimizin bərpası ilə yekunlaşması Müzəffər Ali Baş Komandan, Prezident İlham Əliyevin xidmətləridir. Bu illər ərzində ölkəmiz üçün ən mühüm məsələ olan işğal faktına son qoyulması, güclü və müstəqil Azərbaycanın qurulması istiqamətində dövlət başçısının ən yaxın silahdaşı birinci xanım Mehriban Əliyeva olub. Azərbaycan xalqının Prezident İlham Əliyevə olan sonsuz inam və etimadı Birinci vitse-prezident Mehriban Əliyevaya olan dərin sevgi və məhəbbətlə birləşir. Bu ahəng güclü və müstəqil Azərbaycanın sabaha olan inamını daha da artırır. Daha böyük uğurların, qələbələrin və inkişafın əldə ediləcəyindən xəbər verir.
Tarixi irsimiz bərpa olunur
Qələbəmizin əldə edilməsində canlarından və qanlarından keçən şəhidlərimizin xatirəsinin əziz tutulması da Mehriban xanımın daim diqqətindədir. Birinci xanım ərazi bütövlüyümüz və suverenliyimiz uğrunda canlarından keçən qəhrəmanlarımızın əmanətlərinə ən yüksək səviyyədə sahib çıxır, onların diqqət və qayğı ilə əhatələnməsi üçün yorulmaz fəaliyyət göstərir. Bu gün Qarabağ dirçəlir, işğal zamanı dağıdılmış, məhv edilmiş tarixi-mədəni irsimiz yenidən bərpa olunur. Keçmiş qaçqın və məcburi köçkünlərin öz doğma yurdlarına layiqli şəkildə qayıtması üçün meqalayihələr həyata keçirilir. Bu işlərdə də Prezident İlham Əliyevə ən böyük dəstəyi məhz Mehriban xanım verir. Şuşada, Zəngilanda, Ağdamda yüzlərlə tarixi-mədəni irsimizin, məscidlərimizin bərpası, məktəblərin, bağçaların, səhiyyə ocaqlarının inşası onun rəhbəri olduğu Heydər Əliyev Fondu vasitəsilə həyata keçirilir. Bu gün Şuşa dağlarında Azərbaycan muğamının sədaları bütün Qarabağa yayılır. Vaqifin poeziyası bu torpaqların əzəli və əbədi sahiblərinin məhz bizlər olduğunu dünyaya nümayiş etdirir. Uzun illər həsrətində olduğumuz, sevinc və qürur hissi yaşadığımız bu məqamlarda Mehriban Əliyevanın xalqına, dövlətinə dərin sevgi və məhəbbət hissi ilə bağlı olduğu müqəddəs missiyasının payı böyükdür.