"Dünəndən etibarən 9-11-ci siniflər üçün buraxılış imtahanları başlanılıb. Bu onların taleyini və gələcək müqəddəratını müəyyən edən bir məsələdir. DİM məlumat verib ki, imtahan binasına daxil olarkən hər kəs qoruyucu maskadan istifadə etməlidir".
YENISEHIFE.AZ xəbər verir ki, bu sözləri təhsil üzrə ekspert Kamran Əsədov "Ona qalsa" verilişində söyləyib:
"Bilirsiniz ki, imtahan binasına daxil olan zaman şagirdlərin temperaturu xüsusi tibb işçiləri tərəfindən ölçülür. Bu zaman temperaturu 37 və daha çox olan şəxslər imtahan binasına buraxılmır. Dünənki imtahanlarda 2 nəzarətçi və 20 şagirdin temperaturları yüksək olduğu üçün imtahan binasına girişi məhdudlaşdırıldı. Fikrimcə, həmin şagirdlər növbəti həftələrdə yenidən temperaturu yoxlanılmaqla imtahanlara buraxılmalıdır. Ümid edirəm, aidiyyatı dövlət qurumu bu məsələyə həssas yanaşacaq və temperatur səbəbindən imtahanda iştirak etməyənlərə imtahanlar təşkil ediləcək".